ZPM Vice President-in kum 2028 Inthlan ah sawrkar nawn inbeisei

by Editor

Tualchhung News

ZORAM TODAY| 3rd February 2026: Nimin ZPM Party chhung inkhawm-ah C. Lalnunnema, Vice President chuan thu sawiin, “Lalna leh thuneih duhna avanga a dik a dawk pawh thlu lova midang sawichhiat tur leh puhmawh tur zawn chiam chiam hi a tha lo hle a. Chutiang politics chu ramhlui zia a ni a, keini ZPM te chuan Mizoram-ah Politics khelh dan thianghlim lantir kan tum ngar ngar," a ti a.

"Kan sawrkar hnua thil thleng tam tak han thlir hian ZPM party hian Pathian malsawm ram rim a nam chek chek," a ti bawk.

ZPM Vice President thusawi thenkhatte-

"Dawt sawite, thlalak siamchawp hmanga dawta CM beih te, A dik zawk awm renga a dik lo zawk thehdarh chiam chiam te, hmasawnna rotling siam tum aia vote zawn nana sem policy te, ram leh hnam tana hlawkna tur awm si lova buaina cho chhuak zawnga mipui fuihpawrh te hi Party dangte hian an la sim thei lo hi a pawi em em,"

"Heng bakah hian malsawmna thuahhnih thuahthum kan dawng bawk a- Assam Rifle Bn. sawn chhuah te, Sairang thlenga Rel lo lut te, State dang leh ram pawn atanga khualzin (tourist) lo pung ta te, Share of Taxes hmanga Mizoram sum dawn tur lo pung ta te, etc."

"Pu Lalduhoma, Chief Minister, Finance Minister ni bawk kaihhruaina hnuaiah hian dik tak leh fel takin Mizoram sum enkawl a ni a. Kan sum dawn tur lo pung ta hian Central Sawrkar-in Pu Lalduhoma kaihhruai ZPM Ministry a rin tawk zia tarlanna a ni,"

"Kum 2028-ah pawh Pathian khawngaihna chuan min sawrkar nawntir leh ngei ang tih hi thil beiseiawm tak a ni. Kan khingpuite hian dawt leh thu puarpawleng hmanga min beihnaah hian zam tur kan ni lo va. Huai takin kan ram leh hnam tan hmalam panin kan kal zel dawn a ni," tih a sawi bawk.